Ази, Номхон далайн хамгийн олон улс оролцдог цэргийн хээрийн сургууль “Khaan Quest-2014”-ийн төгсгөлийн шатны төлөвлөлтийн хурал энэ сарын 14-18-ны өдрүүдэд зохион байгуулагдлаа. Хуралд Монгол Улсын Зэвсэгт хүчний төлөвлөлтийн бүлэг, АНУ-ын талаас Номхон далай дахь Хуурай замын цэргийн болон Тэнгисийн явган цэргийн командлал, Аляскийн Үндэсний гвард,  Монгол Улсад суугаа АНУ-ын Элчин сайдын яамны Батлан хамгаалахын атташегийн алба, БНХАУ, Канад, БНСУ, БНЧУ-аас нийт 58 төлөвлөгч оролцов.

“Khaan quest-2014” сургуулийг 6 дугаар сарын 20-ноос 7 дугаар сарын 1-ний өдрүүдэд уламжлал ёсоор команд штабын сургууль, салаадын хээрийн сургууль, эмнэлэг хүмүүнлэгийн болон инженерийн хамтарсан ажиллагаа гэсэн дөрвөн үндсэн хэсгээр зохион байгуулахаар төлөвлөсөн байна.

“Khaan Quest-2013” Энхийг дэмжих ажиллагааны олон улсын хамтарсан сургуульд 15 улс орон оролцож байсан бол энэ жилийн хувьд урьдчилсан байдлаар 20 улс орон цэргийн алба хаагчдаа оролцуулахаа албан ёсоор мэдэгдсэн байна.

Энэ жилийн сургуулийн онцлог нь анх удаа БНХАУ-аас хээрийн сургуульд салаа, эмнэлгийн хамтарсан ажиллагаанд эмч нарын бүлэг оролцуулах бол НАТО-гийн гишүүн орон болох Чех Улсаас хээрийн сургуульд салаа, сургагч багш нар оролцуулахаа албан ёсоор мэдэгджээ. Түүнчлэн салаадын хээрийн сургуульд Зэвсэгт хүчний Энхийг дэмжих ажиллагааны чадавхийг нэмэгдүүлэхэд зайлшгүй шаардлагатай усан эргүүл, амьд гарах арга ухаан зэрэг шинэлэг сургалтуудыг үргэлжлүүлэн зохион байгуулахаас гадна иргэдийн үймээнийг намжаах сургалтыг шинээр зохион байгуулах юм байна.

Энэ жилийн “Khaan Quest-2014” сургуулийн эмнэлгийн хамтарсан ажиллагаа Сонгино хайрхан дүүргийн Толгойтод явагдах бол инженер, засвар тохижилтын хүмүүнлэгийн ажиллагаа Баянгол, Сонгинохайрхан дүүргүүдийн нутаг дэвсгэрт үйл ажиллагаа явуулдаг зарим цэцэрлэг, сургуулиудад өрнөх аж.