БНСУ-ын дөрөв дэх том хот Инчонд 16 хоногийн турш үргэлжилсэн Азийн зуны спортын наадам өнөөдөр хөшгөө хаалаа. Азийн олимпийн зөвлөлд харьяалагддаг 45 орны 9501 тамирчин 36 спортын төрөлд 439 багц медалийн төлөө өрсөлдөхөд Хятадын баг илт давуу өнгөлж, зохион байгуулагч БНСУ болон Японы баг удааллаа. 234 тамирчны бүрэлдэхүүнтэй Инчоныг зорьсон Монголын баг таван алт, дөрвөн мөнгө, 12 хүрэл медаль хүртэж, 45 орноос 16-д жагсав. Манайхан 1974 онд Азийн наадамд оролцож эхэлснээс хойш 1990 онд 17 медаль, 1982 онд гурван алт авсан нь дээд амжилт байв. Тэгвэл энэ удаа монголчууд нийт медаль болоод алтынхаа тоогоор дээд амжилтаа шинэчлэн тогтоолоо.

Эрэгтэй жүдочид бүх жинд медаль авсан, боксоос анх удаа Азийн наадмын аварга мэндэлсэн, буудлагын төрөлд анх удаа ганцаарчилсангаар алт авсан, тэквондо тивийн “олимп”-оос медаль хүртсэн төрлийн тоог нэмсэн, марафонч Б.Сэр-Од медалиас атгаад алдан дөрөвт орсон, зохион байгуулагчдын буруугаас болж Монголын далбааг буруу харуулан байруулсан, эмэгтэй тамирчдын хоолонд бохир зүйл хийсэн... гээд сайн, муугаар дурсах зүйл арвинтай болж өндөрлөлөө, энэ удаагийн Азийн наадам. Мөн зохион байгуулагчид өөрийн орны тамирчдаа дэмжихийн тулд шүүлтэд илт нөлөөлж байсан нь Азийн наадмын түүхэнд тодоор бичигдэх хар толбо болон үлдэж байна.

Ийнхүү сайн, муу холилдсон Азийн XVII наадам түүх болон үлдэж байна. Дөрвөн жилийн дараа Индонезийн Жакартад манай тивийн шилдэг тамирчид дахин өрсөлдөх болно.

Медаль хүртсэн орнууд

Улс                             Алт     Мөнгө Хүрэл Нийт

1.БНХАУ                   151     108        83        342

2.БНСУ                      79        71         84        234

3.Япон                        47        76         77        200

4.Казахстан                28        23         33        84

5.Иран                        21        18         18        57

6.Тайланд                  12        7            28        47

7.БНАСАУ                11        11          14        36

8.Энэтхэг                   11        10          36        57

9.Тайвань                   10        18          23        51

10.Катар                     10        -             4          14

11.Узбекистан            9          14         21        44

12.Бахрейн                 9          6            4          19

13.Хонконг                6          12          24        42

14.Малайз                  5          14          14        33

15.Сингапур              5          6            13        24

16.МОНГОЛ             5          4            12        21

17.Индонез                4          5            11        20

18.Кувейт                  3          5            4          11

19.Саудын Араб       3          3            1          7

20.Мьянмар              2          1            1          4

21.Вьетнам               1          10          25        36

22.Филиппин            1          3            11        15

23.Пакистан              1          1            3          5

23.Тажикистан         1          1            3          5

25.Ирак                     1          -             3          4

25.АНЭУ                  1          -             3          4

27.Шри Ланк            1          -            1          2

28.Камбож                1          -            -           1

29.Макао                   -           3          4          7

30.Кыргызстан         -           2          4          6

31.Йордан                 -           2          2          4

32.Туркменистан     -           1          5          6

33.Бангладеш           -           1          2          3

33.Лаос                     -           1          2          3

35.Афганистан        -           1           1          2

35.Ливан                  -           1           1          2

37.Непал                  -           -           1          1

Нийт                         439     439     576     1454