Румыний хөлбөмбөгийн шигшээ багийн ахлах дасгалжуулагч Виктор Пицуркэгийн оронд Ангел Йорданеску томилогдох магадлал өндөртэй байна хэмээн Sport.ro мэдээллээ. Тус улсын хөлбөмбөгийн холбооны удирдлагууд эхлээд Мирча Луческуд санал тавьсан ч 69 настай мэргэжилтэн “Шахтер”-ыг орхихыг хүсээгүй аж. Түүнчлэн нэр дэвшигчдийн тоонд Берт ван Марвейк, Доринел Мунтяну нар  байсан боловч холбоо тэдэнтэй хэл амаа ололцоогүй аж. А.Йорданескугийн хувьд өмнө нь 1993-98, 2002-04 оны хооронд Румыний шигшээг дасгалжуулж байсан удаатай бөгөөд хамгийн сүүлд 2006 онд АНЭУ-ын “Аль-Айн” багт ажиллаж байгаад тэтгэвэртээ гарсан юм.