Премьер лигийн энэ улирлын нэгэн содон баг нь “Ньюкасл” болоод байна. Улирлын эхэнд тэдэн шиг муу баг байсангүй. А.Пардьюгийн баг эхний долоон тойргоос хожил авч чадаагүй бөгөөд дөрөв тэнцэж, гурав ялагдсан. Энэ үед дасгалжуулагчийн байр суурь сүрхий ганхаад байлаа. Харин “Шаазгайнууд” наймдугаар тойрогт “Лестер”-ийг талбайдаа 1:0-ээр хожсон нь тэднийг эрс сэргээжээ. Үүнээс хойш тэд таван тойрог дараалан ялалт байгуулснаар хүснэгтийн хонгилоос тавдугаар байр хүртэлх их үсрэлтийг хийв. Өнгөрсөн хугацаанд “Лестер”-ээс гадна “Тоттенхэм”, “Ливерпуль”, “Вест Бромвич”, “Куинс Парк Рейнжерс” багууд “Ньюкасл”-ын золиос болжээ. Мөн FA Cup-ийн хүрээнд хүчирхэг “Манчестер Сити”-г талбайд нь хожсоныг дурдах хэрэгтэй.

Лигийн сүүлийн тойрогт Английн хоёр гранд "Арсенал"-"Манчестер Юнайтед"-ын хоорондын тулаан болсон нь олны анхаарлын төвд байсан. Энэ уулзалтад талбайдаа тоглосон "Арсенал" хамаагүй илүү байсан ч олдсон боломжуудаа ашиглаж чадсангүй. Тэдний бүтэлгүйтэлд "Юнайтед"-ын хаалгач Давид Де Хеагийн гайхалтай хаалтууд нөлөөлсөн. "Чи хийж чадахгүй бол би хийе" гэсэн хөлбөмбөгийн бичигдээгүй дүрэм ёсоор зочид тулааны эхний гоолыг оруулсан. Улмаар 85 дахь минутад У.Руни сөрөг довтолгоогоо амжилттай болгосноор "Юнайтед" хожих нь бараг тодорхой болжээ. Сүүлд О.Жиру тооны зөрүүг багасгасан ч хэтэрхий оройтсон байв. "МЮ" ийнхүү заналт дайснаа хожсоноор хүснэгтийн дөрөвдүгээр байр руу дэвшсэн бол хоёр дараалан дийлдсэн "Арсенал" найм руу уруудав.

Түүнчлэн "Ливерпуль" гурав дараалсан ялагдлаа амссанаар 12-р байр руу уналаа. Тэгвэл "Челси", "Манчестер Сити" гэсэн том багууд ээлжит хожлоо авсан юм. Ингээд Премьер лигийн 2014-15 оны улиралд багууд ямархуу амжилттай явааг сонирхуулья.

Баг                              Тт        Хо       Тэ        Хд       Б/Х      Оноо

1.Челси                       12        10        2          -           30-11   32

2.Саутгемптон           11        8          1          2          23-5     25

3.Ман.Сити                12        7          3          2          24-13   24

4.МЮ                          12        5          4          3          19-15   19

5.Ньюкасл                  12        5          4          3          14-15   19

6.Вест Хэм                 12        5          3          4          20-16   18

7.Суонси                     12        5          3          4          16-13   18

8.Арсенал                   12        4          5          3          20-15   17

9.Эвертон                   12        4          5          3          22-19   17

10.Тоттенхэм             12        5          2          5          16-17   17

11.Сток Сити             12        4          3          5          13-15   15

12.Ливерпуль             12        4          2          6          15-18   14

13.Вест Бром             12        3          4          5          13-17   13

14.Сандерлэнд           12        2          7          3          12-19   13

15.Кристэл Пэлас      12        3          3          6          17-21   12

16.Халл Сити             12        2          5          5          14-17   11

17.Астон Вилла         11        3          2          6          5-16     11

18.Лестер                   12        2          4          6          11-18   10

19.Барнли                   12        2          4          6          8-20     10

20.КПР                       12        2          2          8          11-23   8