Монгол Улсын Их Хурлаас баталсан “Монгол мал” үндэсний хөтөлбөр, Дорнод аймгийн иргэдийн Төлөөлөгчдийн Хурлаас  баталсан  “Тэмээ”  дэд  хөтөлбөрийн хүрээнд “Тэмээчдийн зөвлөгөөн-Тэмээн соёлын өдөрлөг”-ийг энэ өдрүүдэд зохион байгуулж байна. Өдөрлөг өчигдөр буюу 02-р сарын 24-ны өдөр “Тэмээчдийн зөвлөгөөн”-өөр эхэллээ. Дорнод Политехник коллежийн хурлын танхимд зохион байгуулсан “Тэмээчдийн зөвлөгөөн”-д Булган, Гурванзагал, Баянтүмэн, Сэргэлэн, Цагаан-Овоо зэрэг 10 сумын тэмээчид оролцов. Зөвлөгөөнөөр “Тэмээ” дэд хөтөлбөр болон тэмээ өсгөн үржүүлэх тухай илтгэл  тавьж, тэмээчдийн санал,  бодол,  учирч буй хүндрэл бэрхшээлийг  сонсож, шинээр болон урьд нь хэрэгжүүлж байсан санаачилга, туршлагаа хуваалцлаа.  Зөвлөгөөнөөс зөвлөмж гарган нийт малчдад хүргүүлэх аж. Мөн энэ үеэр Тэмээчдийн холбоог байгуулсан байна. Өдөрлөг өнөөдөр аймгийн Төв цэнгэлдэх хүрээлэнд үргэлжилнэ. Энэ үеэр Тэмээн цуваа, галын тахилга, 12 жил дуудах, урлагийн үзүүлбэр, буйл зорж ногт зангидах тэмцээн, ганган тэмээ шалгаруулах уралдаан, эмнэг тэмээ сургах, ботгоны урамшуулал гардуулах, тэмээн поло зэрэг арга хэмжээнүүд болох юм.