Улаанбаатар хотын Захирагчийн ажлын албанаас нийслэлийн хөрсний бохирдол, тоосжилтыг бууруулах зорилгоор хийж байгаа ажлуудын нэг нь усан хөшиг юм. Үндэсний Их баяр наадмын өмнө Зайсангийн гүүрэнд усан хөшиг хийж, ашиглалтад хүлээлгэн өгч байсан бол өнөөдөр Арслантай гүүрний усан хөшигний нээлт боллоо.

Арслантай гүүрний усан хөшигний нээлт боллоо

Нээлтийн ажиллагаанд Улаанбаатар хотын Ерөнхий менежер бөгөөд Захирагчийн ажлын албаны дарга Б.Бадрал, “Нийтийн үйлчилгээний Улаанбаатар нэгтгэл” НӨҮГ – ын дарга Д.Энхсайхан болон бусад холбогдох албаны хүмүүс оролцов.

Усан хөшгийг “Хан урсгал” ХХК богино хугацаанд хийж гүйцэтгэжээ. Цаашид уг усан хөшигний үйл ажиллагааг “Нийтийн үйлчилгээний Улаанбаатар нэгтгэл” НӨҮГ хариуцаж ажиллах юм. Усан хөшиг нь шөнийн цагаар гэрэлтдэг бөгөөд өглөөний 08 цагаас 23 цаг хүртэл ажиллана.

Усан хөшиг нь шөнийн цагаар гэрэлтдэг бөгөөд өглөөний 08 цагаас 23 цаг хүртэл ажиллана

Нээлтийн арга хэмжээний үеэр Улаанбаатар хотын Ерөнхий менежер бөгөөд Захирагчийн ажлын албаны дарга Б.Бадрал “Усан хөшиг нь харахад энгийн мөртлөө тоосжилт, эрүүл ахуйд нөлөөлж байгаа бусад сөрөг зүйлүүдийг бага ч болов бууруулах ач холбогдолтой. Бид цаашид Маршил, Дунд гол зэрэг гүүрэнд усан хөшиг хийж тохижуулахаар төлөвлөн ажиллаж байна” гэв.

Усан хөшиг нь харахад энгийн мөртлөө тоосжилт, эрүүл ахуйд нөлөөлж байгаа бусад сөрөг зүйлүүдийг бага ч болов бууруулах ач холбогдолтой

Харин “Нийтийн үйлчилгээний Улаанбаатар нэгтгэл” НӨҮГ – ын дарга Д.Энхсайхан “Арслантай гүүрнээс 300 метр газар усан толио үүсгэх ажлыг эхлүүлнэ. Наймдугаар сарын 10-ны өдөр гэхэд усан толионы ажлыг дуусгахаар төлөвлөж байна. Ирэх жилээс эхлэн олон ажлыг хийх юм. Уг усан хөшиг бол уг ажлуудын зөвхөн эхлэл юм шүү. Арслантай гүүрний дээд доод хэсгийг ирэх жилээс эхлэн улам тохижуулна”гэлээ