Нийслэлийн удирдлагын зөвлөлийн ээлжит хуралдаан 2016 оны зургаадугаар сарын 20-ны өдөр болж хуралдаанаар Баяхошуу, Сэлбэ дэд төвийн ажлын явцыг танилцуулж, төслийн хоёрдугаар шатыг хэрэгжүүлэх байршлын  тухай хэлэлцлээ. Хуралдаанд энэ асуудлыг Нийслэлийн Засаг даргын Хот байгуулалт, хөрөнгө оруулалтын асуудал хариуцсан орлогч С.Очирбат танилцууллаа.

Улаанбаатар хотыг 2020 он хүртэл хөгжүүлэх ерөнхий төлөвлөгөөнд нийслэлийг найман дэд төвтэй байхаар тусгасан бөгөөд Баянхошуу, Долоон буудал орчим эхний ээлжийн дэд төвүүдийг байгуулахаар нийслэлийн ЗДТГ, Азийн хөгжлийн банктай хамтран “Улаанбаатар хотын гэр хорооллыг хөгжүүлэх, хөрөнгө оруулалтыг дэмжих хөтөлбөр” төслийг хэрэгжүүлж байгаа юм. Төслийг гурван үе шаттайгаар хэрэгжүүлэхээр тохиролцож  эхний шатанд  Долоон буудал орчим буюу Чингэлтэй дүүргийн 14, 18-р хороо, Сүхбаатар дүүргийн 14 дүгээр хорооны 156 га талбайг дахин төлөвлөж Сэлбэ дэд төв, СХД-ийн 7,8,9,10,28 дугаар хорооны нийт 162 га талбайг дахин төлөвлөн Баянхошуу дэд төв болгон хөгжүүлэхээр бүтээн байгуулалтын ажил эхэлсэн. Эхний ээлжинд дэд төвүүдийг хүн амын нягтаршил өндөр, гэр хорооллын бүсэд байгуулах нь зөв гэж үзсэн учраас  Баянхошуу, Долоон буудлыг сонгосон. Энэ төвүүдийг газар зүйн байрлалаас шалтгаалан хооронд нь авто замаар холбох бүрэн боломжтой. Баянхошуу , Сэлбэ дэд төвүүдийн  бүтээн байгуулалтын ажил  2014 оноос эхэлсэн сургууль, цэцэрлэг, мэргэжлийн сургалт үйлдвэрлэлийн төв, худалдаа үйлчилгээний цогцолборын нарийвчилсан зураг төсөл гарсан гэдгийг тэрээр хэллээ.

Эхний ээлжинд дэд төвүүдийг хүн амын нягтаршил өндөр, гэр хорооллын бүсэд байгуулах нь зөв гэж үзсэн
 

Мөн төслийн хүрээнд Сүхбаатар дүүргийн 14-р хороо болон Сонгинохайрхан дүүргийн наймдугаар хороонд  иргэдийг түр суурьшуулах зориулалттай 50 айлын хоёр орон сууцыг барьж, улсын комисс бүрэн ашиглалтад хүлээн авсан.  Одоо  Европын хөрөнгө оруулалтын банкнаас санхүүжүүлэн Баянхошуу, Сэлбэ дэд төвүүдийн бохирын шугамыг татах ажил үргэлжилж байгаа бөгөөд 11 сард дуусгахаар төлөвлөн ажиллаж байна гэсэн юм.

Иргэдийг түр суурьшуулах зориулалттай 50 айлын хоёр орон сууцыг барьж, улсын комисс бүрэн ашиглалтад хүлээн авсан
 

Баянхошуу дэд төвд  тавих бохирын гол шугам нь СХД-ийн 4,5,7,18,26 дугаар хороо буюу Баянхошууны тойргийн уулзвараас Таван шар, Мах импексийн уулзвар хүртэл 6,3 км үргэлжилэх бол Сэлбэ дэд төвийн бохирын гол шугам нь  Долоон буудлын эцсээс 17-р сургуулийн уулзвар хүртэл буюу Чингэлтэй дүүргийн 14, 18-р хорооны нутаг дэвсгэрээр нийт 2,1 км үргэлжилж байгаа юм байна.

Бохир усны шугамын зурваст нийт 145 нэгж талбар өртөж байгаагаас эхний ээлжинд 23 нэгж талбарын газрыг чөлөөлөхөөр иргэдтэй гэрээ хийжээ
 

Бохир усны шугамын зурваст нийт 145 нэгж талбар өртөж байгаагаас эхний ээлжинд 23 нэгж талбарын газрыг чөлөөлөхөөр иргэдтэй гэрээ хийжээ.  Дэд төвүүдийн дулааны станцыг түлхүүр гардуулах нөхцөлөөр тендер зарлахаар бэлдэж эхэлжээ.  Харин төслийн хоёрдугаар шатыг Дэнжийн 1000 орчмын 81, 98  га талбайд, Дамбадаржаа орчмын 66,75 га талбайд хэрэгжүүлэхээр байршлыг сонгосон байна. Дэд төвүүдийг байгуулснаар гэр хороололд төрийн үйлчилгээ болон дэд бүтцийн асуудал бүрэн шийдэгдэнэ. Ингэснээр иргэд заавал хотын төв рүү ирж төрийн үйлчилгээ авах шаардлагагүй,  айл өрхүүдэд дэд бүтэц ойртуулж  өгснөөр иргэд байшин барих уу, хамтаараа нийлж орон сууц барих уу, “Сайн хашаа” хөтөлбөрт хамрагдах уу гэсэн шийдлээ өөрсдөө гаргах боломжийг бүрдүүлж өгөх болно гэж нийслэлийн удирдлагууд үзэж байна гэж Нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.

Төслийн хоёрдугаар шатыг Дэнжийн 1000 орчмын 81, 98  га талбайд, Дамбадаржаа орчмын 66,75 га талбайд хэрэгжүүлэхээр байршлыг сонгосон